વિશ્વ પર્યાવરણ દિવસ નિમિત્તે અમરેલીમાં ભવ્ય વૃક્ષારોપણ કાર્યક્રમ યોજાયો, પર્યાવરણ સંરક્ષણનો સંદેશ અપાયો

News

Posted by WHRRC | June 05, 2026

5 જૂન 2026ના રોજ વિશ્વ પર્યાવરણ દિવસ નિમિત્તે વર્લ્ડ હ્યુમન રાઈટ્સ રિસર્ચ કાઉન્સિલ (WHRRC) દ્વારા અમરેલી સ્થિત સિદ્ધેશ્વર મંદિરના પ્રાંગણમાં પર્યાવરણ જાગૃતિ અને વૃક્ષારોપણ કાર્યક્રમનું આયોજન કરવામાં આવ્યું હતું. આ કાર્યક્રમનું આયોજન શ્રીમતી ઉર્મિલાબેન મહેતા (સ્ટેટ પ્રેસિડેન્ટ, ગવર્મેન્ટ એમ્પ્લોયી સેલ) અને તેમની ટીમ દ્વારા કરવામાં આવ્યું હતું. કાર્યક્રમમાં સ્થાનિક નાગરિકો, સમાજસેવકો અને સંસ્થાના પદાધિકારીઓએ ઉત્સાહપૂર્વક ભાગ લીધો હતો.

કાર્યક્રમમાં મુખ્ય અતિથિ તરીકે શ્રી મૌલિકભાઈ ઉપાધ્યાય (ચેરમેન, અમરેલી નગરપાલિકા), શ્રી અજયભાઈ પંડ્યા (એડવોકેટ), શ્રીમતી કલગીબેન ત્રિવેદી (નગરપાલિકા સભ્ય) અને શ્રી સુરેશભાઈ જોષી (પ્રમુખ, સિદ્ધેશ્વર મંદિર સમિતિ) ઉપસ્થિત રહ્યા હતા. કાર્યક્રમની શરૂઆત અતિથિઓ અને પદાધિકારીઓના સ્વાગત અને પરિચય સાથે કરવામાં આવી હતી.

આ પ્રસંગે શ્રીમતી પથિકાબેન મહેતા (ડિસ્ટ્રિક્ટ પ્રેસિડેન્ટ, અમરેલી)એ વૃક્ષોના મહત્વ વિશે સમજાવતા જણાવ્યું કે વૃક્ષો માનવ જીવનનો આધાર છે અને પર્યાવરણનું સંતુલન જાળવવામાં તેમની મહત્વપૂર્ણ ભૂમિકા છે. ત્યારબાદ શ્રીમતી ભાવનાબેન ભટ્ટ (સ્ટેટ પ્રેસિડેન્ટ, ચાઇલ્ડ પ્રોટેક્શન સેલ)એ જણાવ્યું કે વૃક્ષો માત્ર ઓક્સિજન જ આપતા નથી, પરંતુ વરસાદના ચક્રને જાળવવામાં પણ મહત્વપૂર્ણ યોગદાન આપે છે. તેમણે સારા વરસાદ, સારી ખેતી અને સ્વસ્થ પર્યાવરણ માટે વધુમાં વધુ વૃક્ષો વાવવા અપીલ કરી હતી.

વક્તવ્યો બાદ સિદ્ધેશ્વર મંદિરના મેદાનમાં વૃક્ષારોપણ કાર્યક્રમ યોજાયો, જેમાં તમામ મહાનુભાવોએ પોતાના હસ્તે વૃક્ષોનું રોપણ કર્યું અને તેમના સંરક્ષણનો સંકલ્પ લીધો. કાર્યક્રમમાં સ્ટેટ પ્રેસિડેન્ટ શ્રીમતી યશોધરાબેન પંડ્યાની વિશેષ ઉપસ્થિતિ રહી હતી. તેમણે પણ વૃક્ષારોપણ કરીને પર્યાવરણ પ્રત્યેની પોતાની પ્રતિબદ્ધતા વ્યક્ત કરી હતી. આ ઉપરાંત અલ્પાબેન કરેલિયા અને હિરલબેન વાલાએ પણ કાર્યક્રમમાં સક્રિય ઉપસ્થિતિ નોંધાવી અને પર્યાવરણ સંરક્ષણના સંદેશને જનજન સુધી પહોંચાડવા માટે પોતાના વિચારો વ્યક્ત કર્યા હતા. કાર્યક્રમમાં સોસાયટી તથા આસપાસના વિસ્તારના અનેક લોકોએ ઉત્સાહપૂર્વક ભાગ લીધો હતો.

કાર્યક્રમના સમાપન પ્રસંગે શ્રીમતી ઉર્મિલાબેન મહેતાએ જણાવ્યું કે વિશ્વ પર્યાવરણ દિવસનો અર્થ માત્ર વૃક્ષારોપણ સુધી મર્યાદિત નથી, પરંતુ આપણા આસપાસના પર્યાવરણને સ્વચ્છ અને સુરક્ષિત રાખવાની જવાબદારી પણ છે. તેમણે પ્લાસ્ટિકનો ઓછો ઉપયોગ કરવા, વીજળીની બચત કરવા, વધુમાં વધુ પગપાળા ચાલવા અને જાહેર પરિવહનનો ઉપયોગ કરીને પ્રદૂષણ ઘટાડવાનો સંદેશ આપ્યો હતો. તેમણે જણાવ્યું કે પર્યાવરણ દિવસ આપણને પ્રકૃતિ પ્રત્યેની જવાબદારીઓ સમજવા, શીખવા અને અન્ય લોકોને જાગૃત કરવાની પ્રેરણા આપે છે.

કાર્યક્રમનો સમાપન પર્યાવરણ સંરક્ષણની સામૂહિક પ્રતિજ્ઞા સાથે કરવામાં આવ્યો હતો અને તમામ ઉપસ્થિતોએ હરિયાળું અને સ્વચ્છ ભવિષ્ય નિર્માણ માટે સક્રિય યોગદાન આપવાનો સંકલ્પ વ્યક્ત કર્યો હતો.